Sesiwn gan Lywodraeth Cymru yw hon a fydd yn eich arwain drwy’r ‘Cod Ymarfer ar gyfer Cyllido’r Trydydd Sector’ (drafft) newydd sy’n bwriadu cael ei gyhoeddi’n ddiweddarach yn y flwyddyn. Ymunwch â Phil Fiander, Cadeirydd Is-bwyllgor Cyllid a Chydymffurfio Cyngor Partneriaeth y Trydydd Sector, ynghyd ag aelodau eraill o’r pwyllgor a swyddogion Llywodraeth Cymru, i ddysgu mwy am y safonau cyllido newydd hyn a rhoi eich barn arnynt. Os ydych chi eisiau estyn help llaw i ail-lunio’r dirwedd gyllido yng Nghymru neu ddeall arferion gorau yn y maes cyllido’n well, dewch i’r sesiwn.

Mae dull newydd o ymdrin â gwirfoddoli yng Nghymru yn cael ei ddatblygu gan randdeiliaid gwirfoddoli allweddol, gyda chymorth Llywodraeth Cymru ac CGGC. Ei nod yw diweddaru ac ehangu’r polisi presennol ar wirfoddoli yn unol â’r canfyddiadau ymchwil diweddaraf, a’r arferion da sydd wedi’u canfod mewn gwledydd eraill. Bydd y dull newydd yn cael ei gyd-gynllunio gan randdeiliaid gwirfoddoli o bob sector. Os oes gennych ddiddordeb mewn Gwirfoddoli, bydd y sesiwn hon yn gyfle i fwydo i mewn i’r gwaith pwysig hwn ar yr adeg dyngedfennol. https://wcva.cymru/cy/projects/dull-newydd-o-wirfoddoli-yng-nghymru/

Mae’r Brifysgol Agored yng Nghymru, mewn partneriaeth â’r cynghorau gwirfoddol rhanbarthol ac CGGC, wedi datblygu’r rhaglen ‘Elwa drwy Wirfoddoli’. Mae’n helpu gwirfoddolwyr i wella eu gwybodaeth a’u sgiliau fel eu bod yn manteisio i’r eithaf ar wirfoddoli – neu hyd yn oed yn symud ymlaen i rôl wirfoddoli uwch. Dyma rai o’r pynciau y byddwn yn edrych arnynt: gwydnwch a llesiant arweinyddiaeth dysgu pellach Yn y sesiwn hon, byddwn yn trafod sut gall Elwa ar Wirfoddoli eich helpu chi a’ch mudiad. Mae’r Brifysgol Agored yng Nghymru hefyd eisiau clywed eich syniadau ar sut gellid datblygu’r rhaglen yn y dyfodol. https://www5.open.ac.uk/wales/cy

Mae sicrhau ffrwd incwm amrywiol yn cynyddu gwydnwch mudiad, a dyma pam y mae’n bwysicach nag erioed bod gan bobl sy’n gweithio gyda’r sector gwirfoddol y sgiliau a’r adnoddau sydd eu hangen arnynt i adnabod a sicrhau cyllid cynaliadwy. Yn y sesiwn hon, byddwch yn clywed yn uniongyrchol gan elusen fechan am eu taith i amrywio eu hincwm, a fydd yn cynnwys cyfle i ofyn cwestiynau ac edrych ar eich gobeithion a’ch heriau. Magwch hyder yn eich gallu i fynd ati’n llwyddiannus i amrywio incwm eich mudiad yn gywir fel y gallwch barhau â’r gwaith gwych rydych chi’n ei wneud. https://wcva.cymru/cy/hafan/